Кыргызстан Ислам Университети
October 12, 2026


# КИУ ФОНДУНУН КОМАНДАЛАРЫ СПОРТТУК МЕЛДЕШТЕ БИРИНЧИ ОРУНДАРДЫ ЭЭЛЕДИ Мураталы ажы Жумановдун жаркын элесине арналган диний билим берүү мекемелеринин жана диний уюмдардын арасында футбол жана волейбол боюнча спорттук мелдеш өткөрүлдү. Мелдешке жогорку окуу жайлардын, медреселердин жана диний фонддордун командалары катышып, спорттун эки түрү боюнча күч сынашты. Аталган спорттук иш-чарага **Кыргызстан Ислам университетинин (КИУ) окутуучулар жана студенттер командалары, ошондой эле «КИУ Фондунун» командалары** активдүү катышышты. Футбол боюнча мелдеште университеттин окутуучулар командасы чейрек финалга (1/4) чейин жетип, мыкты оюн көрсөттү. Ал эми **«КИУ Фондунун» командасы биринчи орунду багындырып**, жеңүүчү аталды. Университеттин студенттер командасы 1/8 финалга чейин жетип, кийинки баскычка өтө алган жок. Ошого карабастан, студенттер мелдешке жигердүү катышып, командалык ынтымакты жана спортко болгон кызыгуусун көрсөтүштү. Волейбол боюнча мелдеште да **«КИУ Фондунун» командасы биринчи орунду ээлеп**, дагы бир ийгиликке жетишти. Бул спорттук иш-чара катышуучулардын ортосундагы достукту, ынтымакты жана өз ара кызматташтыкты бекемдөөгө, сергек жашоо образын жайылтууга, ошондой эле Мураталы ажы Жумановдун жаркын элесин урматтоо менен эскерүүгө багытталды. **Кыргызстан Ислам университетинин жамааты «КИУ Фондунун» жеңүүчү командаларын чын жүрөктөн куттуктап, мелдешке катышкан бардык спортчуларга ыраазычылык билдирет.** Бардык катышуучуларга бекем ден соолук, спорттук ийгиликтер жана жаңы жеңиштерди каалайбыз!